SAUDAÇÃO AOS PEREGRINOS – CACHEU (04.12.2010)

SAUDAÇÃO AOS PEREGRINOS – CACHEU (04.12.2010)

Bom dia, nha ermons Peregrinos!

N’é dia garandi di nó Peregrinaçon (i n’na lembranta bós cuma purmero ano que nó fassil i na ano 1984, es i 26º ano que nó na fassil), na nomi di Paróquia di Cacheu n’na fala bós mantenha: Pa paz di Cristo cu bençon di Maria, nó Mame, stá sempre cu bós! (a)

Paróquia que na ricibi bós aós i quil más antigo di Guiné-Bissau. Historiadoris cuma i criado cerca di ano 1590. Té Julho di 1951 si cabeça ó sede i seduba Cacheu. Dipus si sede i passantado pa Canchungo, pa bia di transferência di Padres Franciscanos di Cacheu pa Canchungo. Ma pa decreto di nó Bispo D. José Camnate, dia 9 di Julho di 2009 i criado nobo Paróquia de Cantchungo (Paróquia di Santo António); né mesmo data.- 9 di Julho di 2009 – sede ó cabeça di Paróquia di Nossa Senhora di Natividade i riba más pa Cacheu. Na cumçada, i ta tchomaduba paróquia di Nossa Senhora di Vencimento. Na fim di século XVIII Igreja paroquial bim cai. Pa bia di quilá, cristons cumça bá ta djunta pa rassa na capela di iarderos di Pascoal Pereira da Silveira, que sedo família Alvarenga. É capela ta tchomaduba ermida ó capela di Santo António, que cumpuduba na cabantada di século XVII, ó talvez antis, na metadi di século XVII. I es capelassinho di Santo António que na século XIX passa bá ta tchomado igreja di Nossa Senhora di Natividade, i Paróquia di Cacheu dado també nomi di Paróquia di Nossa Senhora di Natividadi.

Nó djunta li aós pa nó rassa, pa nó fassi celebraçon di Eucaristia i pa nó sucuta Palabra di Deus, djunto cu Maria, que sedo Mame di Jesus cu Mame di Igreja tam.

Pa bia nó sibi cuma EUCARISTIA cu Palabra di Deus, élis que ta djudano pui na prática lema di nó Peregrinaçon; élis que ta djudano iangaça um bom consciência – um consciência nobo; é ta dano tam possibilidadi di nó pui nó sintido na quil baluris que ta cumpu mundo nobo cu homi nobo, quil homi nobo que nó na pricisa del pa é tchon di Guiné-Bissau riba di um biás pa sempre na caminho di berdadero democracia, di djustiça, di paz cu reconciliaçon entre tudo si fidjos; i pa i ca odjado más nim nogós di droga, nim matança di pecaduris, nim suco di bás, suma condiçon pa alguim pudi otcha quil qui tem direito di otcha.

Maria pudi djudano iangaça é consciência nobo cu é sintido nobo; i pudi djudano tene um manera di pensa que bali cu um manera di vivi que ta tornano exemplo pa utrus, pa quilis própi que ca sedo cristons.

I é certeza que puno nó djunta li aós suma si fidjos.

Parança Deus nó consegui é objectivo, pa é Peregrinaçon pudi marca di um manera fundo – i bonito tam – nó vida criston cu nó Igreja di Guiné-Bissau.

Quilá que n’na dissidja bós.

Pa Nossa Senhora di Natividadi benci bós, i djuda bós bó stá sabi – cu contentamento garandi na corçon – n’é cau cu n’é praça, ndé que si fidjos quirido di tempo antigo cumpu si casa, que sedo Santuário di Nossa Senhora di Natividadi.

________________________________________________________

a) I tem dus ó tris anos que Pereginaçon ca fassido a nível nacional ó di Diocese pa bia di cólera ó pa bia caminho danaba dimas. Ma nunca i ca dixa di fassido, pelo menos a nível di Sector ó di Paróquia di Canchungo/Cacheu.

Leave a Reply

Il tuo indirizzo email non sarà pubblicato. I campi obbligatori sono contrassegnati *